Журнал «Мах дуг»-ы æндæр æмæ æндæр номыртæй
Анекдоттæ æмæ хъæлдзæг ныхæстæ
* * *
Гагрæ. Денджызы был ресторан. Фынджы уæлхъус нæлгоймаг æмæ сылгоймаг — æрыгæттæ. Бæрæг у, лæг æмæ ус кæй не сты, уый. Сæ фынджы цур æрлæууыди бынæттон лæппулæг, цыдæр æнæхсæст:
— Генацвале, — дзуры нæлгоймагмæ. — Бар мын ратт æмæ дын кафынмæ рахонон дæ дзæбæх æмбалы.
Нæлгоймаг гуырысхотæ кæны, уый бамбаргæйæ лæппулæг йæ ныхас адарддæр кодта:
— Дæ саурæсугъды... Дæ урс æхсинæджы... Дæ удыкъæртты... Дæ уæларвон зæды...
Сылгоймаг цыдæр зæгъынмæ хъавы, фæлæ йæ гуырдзиаг цæхгæр фæурæдта:
— Ды та, гацца, дæ дзыхыл хæц, джигиттæ куы фæныхас кæнынц, уæд!
* * *
Иу дзырддзæугæ сылгоймаг, кæд ын хицæутты цæсты кад уыд, уæддæр йæ сусæг уарзоны бынатмæ бакæнын нæ бафæрæзта: лæгмæ курдиаты мыггагæй ницы уыди. Гъемæ йæм уæд смой кодта. Сусæг уарзонæн бæззы, адæммæ равдисыны аккаг чи у, ахæм. Мойæн та чифæнды дæр бæззы.
* * *
Алцы бакæнынмæ дæр чи сарæхстаид, ахæм хæрамзæрдæ сылгоймагæй чидæр куы раппæлыд, уæд дын аббат Трюбле афтæ:
— Бæгуы, бæгуы! Марынвæнд дæ куы скæна, уæд дын мæргтæн сæ тæккæ дзæбæхдæр равзардзæни!
* * *
Графиня де Буффлер принц Контийæн афтæ загъта, ды, дам, тирантæн сæ тæккæ хуыздæр дæ.
Æхсин д’ Эпарбейы йæ хуыссæнуатмæ бакодта Людовик XV. Иуафон ын къарол уайдзæфгæнæгау афтæ:
— Мæ дæлбар адæмæй кæимæ нæ фæдæ, ахæм нал баззад.
— Охх, мæ паддзах...
— Герцог Шуазел дæ йæ мондæгтæ фæиста.
— Омæ дзырддзæугæ лæг у.
— Маршал Ришелье дæр.
— Омæ дзыхарæхст у.
— Ноджы Монвил.
— Цы хæрзконд къæхтæ йын и, уый куы зонис.
— Фæуæд афтæ! Фæлæ герцог д’ Омон та? Уымæ, кæй ранымадтай, уыцы миниуджытæй иу дæр куынæ ис.
— Охх, мæ паддзах, уый дыл ахæм æнувыд у, æмæ диссаг!
* * *
Иу сылгоймаг йæ зонгæ нæлгоймаджы тыххæй афтæ загъта:
— Хæрзæгъдау у, фæлæ фыддзæрин, стæй сæ зондджынтæй нæу. Мæнæ иуæй-иу кæсаг куы вæййы: куы йæ бахæрай, уæд дын дæ буарæн ницы зиан æрхæсдзæни, фæлæ дзы ад нæй, стæй стæгæй йемыдзаг у.
* * *
Иу чызг йæ тæригъæдтæ сыгъдæг кæнынмæ бацыд аргъуанмæ æмæ сауджыны раз басасти:
— Сыгъдæг фыд, иу æрыгон лæппуйæн тынг аргъ кодтон...
— Аргъ кодтай? Цал хатты? — бафарста йæ сауджын.
* * *
Вольтеры трагеди «Меропæ»-мæ гæсгæ арæзт спектаклы бирæтæ сæ цæссыг нæ урæдтой. Æрмæст дзы иу сылгоймаг не скуыдта. Йе ’мбæлттæ йæм дисгæнгæ куы бакастысты, уæд уый загъта:
— Æхсызгонæй бæргæ скæуин, фæлæ абон кадджын æхсæвæрмæ хуынд дæн.
* * *
Ус йæ лæгæн:
— Уыцы Софи Лоренмæ нæлгоймæгтæ диссагæй цы ссардтой, уымæн ницы ’мбарын. Йæ парик, йæ ахуырстытæ æмæ йын йе ’нæуаг гуыр сис — уæд ма дзы, цымæ, цы фендзынæ?
Лæг:
— Дæу.
* * *
Иу сылгоймаг аргъуанмæ бацыди. Хъаст кæны сауджынæн:
— Сыгъдæг фыд, мæ лæджы мемæ цæрын нал фæнды.
— Уæд цæуылнæ?
— Ахæм фыдындимæ, дам, мæ бон цæрын нæу.
Сауджын егъау чиныг райста, бирæ йæ фæрафæлдах-бафæлдах кодта, стæй йæ сæр хæрдмæ сдардта, сылгоймагмæ æдзынæг фæкаст æмæ дзуры:
— Дæ лæг раст зæгъы.